Fangatahana

 

KABARY AM-PANAMBADIANA

 

FANGATAHANA

  Izay no ela Tompokolahy sy Tompokovavy, izay tsy maintsy nisavasavana ny raviny ahitàna ny fotony, nanoritsoritana ny bainga alohan’ny hamadihana azy, ary nitondranay ny tari-dresaka alohan’ny tena amborahana anton-dia.

Voalohany indrindra, misaotra anareo eram-po eran-tsaina, eram-panahy izahay, namoha varavarana raha nandondona izahay, tsy nanosi-boho-tanana ianareo, na nody tsy nahafantatra, fa norosoana tanana izahay noharahabaina, notolorana seza hipetrahana, ary notsenaina tsikitsiky ifandraisana sy hifampitafàna, koa dia faly ny fonay tompokolahy, ravo ny fanahinay tompokovavy.

Tonga ary izahay tompoko, tsy sanatria hanao befihavy toy ny oram-batravatra, na koa hanaitra sy hampihorohoro toy ny varatra, fa tonga izahay, tahaka ny fahatongavan’ny maraina nifandrindra tamin’ny alina, ary toy ny masoandro mibaliaka nifanaraka tamin’ny lohataona. Sonieràna mantsy hono Gara, ny tenieràna tsara, koa ny fijoroanay eto tompoko, tsy sanatria tonga tampoka tahaka ny irak’Andriana izahay, ka manampoka fa tsy mampilaza ohatry ny vehivavy afa-jaza, na sanatria hisosososo fotsiny toy ny vinanto tsy mahare fosa, fa izahay no tonga eto, dia efa tenieranan’ny fianakaviana roa tonta, araka izay efa iaraha-mahalala. Koa ity ary no tonga amin’ilay fitenenana hoe, basy voafahana ka manapoaka no sisa, entana efa voafehy ka miandry mpitondra, ary teny efa nifanomezana ka miandry mpanatanteraka.

Androany ary no fotoana nifanarahana fa hametrahana ny vilany eo ambony toko, hihaonan’ny afo sy ny kitay, hahamasaka ny nahandro.

Koa dia tsy hisalasala intsony tahak’ilay saro-kenatra naka vady aho, ka ho lazaina sa tsy ho lazaina, lany andrao am-pikaorana ny loha, ary lany fotoana eo am-pieritreretana, lany andro misangy takotra tahaka ny boka nangalam-pihinana.

Indreto izahay, avy Ananona, araka ny fitenenana hoe ny tsy ampy ketsa hono mivezivezy, ny very gisa manara-morona, fa izahay kosa mitady fihavanana sy mandady rariny aty aminareo, hangataka ny zanakareo vavy atao hoe R … zanak’Atoa R … sy Ra … monina eto Ananona mba ho vady andefimandrin’ny zanakay Atoa R … avy any Ananona zanak’Atoa R … sy Rato …

Satria tsy tsara hono tompoko raha irery ralehilahy, hoy ny Soratra Masina, tsara  ny roa noho ny iray fa raha lavo misy mpanarina, raha marary misy mitsabo, ary raha faly misy hihomehy. Aty aminareo hono tompoko, no misy izay mba niriny, satria ny hetaheta tsy afa-dronono, ny hidihidy tsy vitan-tsafosafo, fa ato aminareo koa no misy ny fanalahidy mahavoha ny trano, ny zazavavy namoha sy nanaitra ny fitiavan-janakay. Tsy sanatria anefa fitiavana miserana tahaka ny tselatra, na hiredareda am-boalohany toy ny afo mololo, fa fitia varo-maty toy ny lamban’akoho, ka faty no isarahana.

Koa mangataka izahay tompoko, fa izay mangataka hono no omena, izay mandondona no hovohana, izay mitady no hahita. Koa mino izahay fa tsy hanosim-bohon-tanana anay ianareo.

Misaotra tompokolahy, mankasitraka tompokovavay.

Pasteur RANDRIANARISOA Jean Aimé

20 votes. Moyenne 3.10 sur 5.

Commentaires (4)

1. Abserropoto (site web) 03/09/2012

mvLREJgO sac longchamp pliage GwGgRCOqIO <a href=http://saclongchampvpliagesoldes.com]sac longchamp pliage</a>.. jApbEyl http://saclongchampvpliagesoldes.com

Voir plus de commentaires
Ajouter un commentaire

Vous utilisez un logiciel de type AdBlock, qui bloque le service de captchas publicitaires utilisé sur ce site. Pour pouvoir envoyer votre message, désactivez Adblock.

Créer un site gratuit avec e-monsite - Signaler un contenu illicite sur ce site

×